Скопје, 16 октомври 2013 (МИА) - Обновената препорака на ЕК за почеток на пристапни преговори претставува признание за остварените резултати во изминатата година и сработеното од страна на институциите, администрацијата, политичките и општествени чинители. Република Македонија очекува дека и земјите членки во Советот на ЕУ ќе се раководат од овие аргументи, од заедничкиот интерес на Унијата и во декември, ќе донесат одлука за почеток на преговорите, изјави вечерва премиерот Никола Груевски на заедничката прес-конференција со евроамбасадорот Аиво Орав кој му го предаде Извештајот на ЕК за напредок на земјата за 2013 година.
- Република Македонија останува целосно подготвена да премине во следната фаза од пристапниот процес. Се согласуваме со констатација на Комисијата дека почетокот на преговорите не само што ќе го забрза консолидирањето на реформите и ќе ја зајакне меѓуетничката кохезија туку и ќе го зачува кредибилитетот на проширувањето на Унијата како мериторен процес базиран на цврста условеност, потенцира Груевски.
Што се однесува до добрососедските односи и регионалната соработка Груевски потенцира дека Комисијата отсекогаш ја препознавала и високо вреднувала конструктивната улога на Македонија во билатералните односи со соседните земји и активниот ангажман во регионалните иницијативи. Тоа е случај и со годинешниот извештај што потенцира е од исклучително значење за земјата.
- Владата на Република Македонија ќе продолжи проактивно да вложува во унапредување на односите и во градење мостови на соработка во регионот. Односите со соседните земји членки ни се особено важни. Сакаме да го изодиме патот до членството во ЕУ во соработка и активно користејќи ги нивните искуства. Затоа инициравме и ќе продолжиме да предлагаме со искрена волја мноштво конкретни активностии проекти за унапредување на взамената соработка и доверба, рече премиерот Груевски.
Во однос на наметнатите грчко-македонски разлики околу името тој повтори дека Македонија сака што поскоро да се реши спорот и оти патот до решение е преку владеење на правото и почитување на меѓународната правна рамка дефинирана од ОН и Меѓународниот суд на правдата.
- Сакаме да имаме проактивен и интензивен процес на највисоко политичко ниво. Одлагањето на решавањето на ова прашање не е од корист за никого, дециден е претседателот на Владата.
Според него од исклучително значење е грчко-македонските односи да се развиваат во духот на взаемно почитување, соработка и доверба и партнерство и подвлече дека отворањето на пристапните преговори на ЕУ со Македонија може да придонесе за унапредување на односите меѓу двете земји и надминување на разликите. Тој ја повика Грција да го поддржи донесувањето одлука за Македонија на декемврискиот Европски совет и со тоа директно да придонесе за евроинтеграции на Балканот.
- Посакуваме нашата прва меѓувладина конференција за пристапните преговори да се одржи за време на грчкото претседателство со ЕУ, рече премиерот Никола Груевски.
Тој нагласи дека Извештајот темелно ќе биде разгледан, а препораките ќе претставуваат патоказ за идните активности на Владата во пристапниот процес, пред се во Националната програма за усвојување на правото на ЕУ.
На новинарско прашање евроамбасадорот Орав рече дека нема да коментира дали Извештајот е позитивен или негативен и подвлече дека тој е подготвен од ЕК за да и помогне на Владата во реформите за кога земјата, на која се гледа како идна членка, ќе се приклучи на европското семејство да биде подготвена да ги прифати сите обврски кои произлегуваат од членството.
Извештајот за напредокот на земјата евроамбасадорот Орав денеска им го предаде и на претседателот на државата Ѓорге Иванов и на претседателот на Собранието на РМ Трајко Вељаноски. Утре ќе и биде презентиран и на опозицијата.