Атина, 24 октомври 2013 (МИА) – Бугарскиот министер за надворешни работи Кристијан Вигенин изјави дека неговата одлука да ја нарече нашата земја поранешна југословенска Република Македонија на средбата со Венизелос била исправна.
- Има запис од нашите изјави, да тоа е официјалното име на Македонија, на Република Македонија, кое се употребува во рамки на Европската унија и од Грција. Како гостин на Грција, не сметам дека направив грешка што го употребив тоа име, ја пренесуваат грчките медиуми изјавата на Вигенин за бугарското национално радио.
Тој додал дека „Бугарија нема никаква врска со проблемот за името и ја призна Македонија под уставното име кое го употребува во билатералните односи“.
Вицепремиерот и министер за надворешни работи на Грција Евангелос Венизелос минатата недела во Атина го прими шефот на бугарската дипломатија Крстијан Вигенин со кого разговараа и за односите на двете земји со Македонија, како и за евроатлантските интерграции на нашата земја.
На прес-конференцијата по средбата, Вигенин ја нарече Македонија – поранешна југословенска Република Македонија, што предизвика реакции во македонските медиуми.