Њујорк, 12 ноември 2013 (МИА) - Со гласање во Генералното собрание на ОН Македонија пред малку беше примена за членка на Советот за човекови права на ОН. Македонската кандидатура доби поддршка од 177 држави членки на ОН и го пополни едното од двете испразнети места резервирани за државите од Источноевропската група, членки на ОН.
Со ова, јави известувачот на МИА, Македонија во следните три години ќе има можност да учествува во работата на водечкото светско тело за заштита и унапредување на човековите права. Советот за човекови права има 47 членки кои во соработка со високиот комесар за човекови права разгледуваат извештаи за состојбите во државите членки можат да отворат дискусија за одредени прашања и да побараат испраќање на специјален известувач во одредена земја.
Македонското Министерство за надворешни работи го постави членството во Советот за човекови права како еден од своите врвни приоритети во мултилатералата.
При својата неодамнешна посета на ОН претседателот на Владата Никола Груевски и министерот за надворешни работи Никола Попоски во своите средби работеа за промовирање на македонската кандидатура.
Во пресрет на денешното гласање Организацијата ОН-Воч со седиште во Женева од каде работи Советот за човекови права ја прогласи Македонија за една од четирите најдобро подготвени кандидат за членство во овој Совет заедно со Британија, Франција и Мексико. Изборот на некои од новите членки како Кина, Куба или Русија предизвика критики поради состојбата со човековите права кај нив.