Митрополитот Повардарски Агатангел упати Велигденско Послание

Велес, 19 април 2014 (МИА) - Митрополитот Повардарски Агатангел денеска на прес-конференција испрати Велигденско Послание до свештенослужителството,монаштвото и верните чеда на Македонската православна црква по повод претстојниот голем празник на Христовото Воскресение Велигден.

Митрополитот Повардарски Агатангел потенцира дека Македонскиот православен народ денеска зачекори во време исполнето со надумна, божествена и воскресенска радост.

- Христос со своето славно воскресение покажа дека смртта е немоќна. Победен е најголемиот човеков непријател! Затоа овој ден е ден на радоста. Велигден е празник над празниците и прослава над прославите. Сознанието за овој настан не ги гали и облагородува само срцата на верните. Оваа света радост денес се разлева насекаде и ги зафаќа сите битија, ја опфаќа целата природа и ги исполнува небото и земјата,потенцира Митрополитот Агатангел.

Митрополитот Повардарски Агатангел ги потсетува православните верници дека Воскресението Христово е силата која и денес препородува, моќно и благотворно допира до душите и срцата човечки, а во целата природа предизвикува триумфална радост и веселие.

- Да ги отвориме своите срца и души за нови благодатни сили, зошто овој ден го создаде Господ да се радуваме и да се веселиме во него. Секоја наша постапка нека биде постојана проповед дека Христос воскресна од мртвите, па да речат оние кои уште не го познале-Еве го Господа, Он живее во срцата и душите на оние кои го носат Неговото име. Христос Воскресна,Навистина Воскресна!,упати порака до православните верници Митрополитот Повардарски Агатангел.