Македонскиот уметник Тони Димитров на изложба на звук во Вашингтон

Скопје, 24 април 2014 (МИА) - Делото „Orthodoxy“ на македонскиот уметник Тони Димитров од денеска до 10 август ќе биде претставено на првата изложба на звук FERMATA. Организатор е уметничкиот центар Artisphere, а изложбата е поместена во нивниот најголем изложбен простор галеријата Terrace во Вашингтон.

Ова дело, кое се состои од теренски снимки, претходно е издадено за португалскиот издавач Green Field Recordings. На покана на фестивалот FERMATA, делото на Димитров ќе биде претставено во Вашингтон заедно со делата на повеќе реномирани звучни уметници.

FERMATA е прва изложба на Artisphere посветена целосно на звукот, и е една од најголемите од ваков вид во светот. Ќе се претстават околу 30 уметници кои користат звук во различни дисциплини и контексти.