Шпекулации кружат деновиве во политичките кругови за тоа како би можел да се одмрзне политичкиот дијалог меѓу ВМРО-ДПМНЕ и СДСМ, но и за тоа што се` било ставено на маса на средбата меѓу Груевски и Заев.
Се споменуваат и раководните позиции во Државниот завод за ревизија, антикорупциската комисија и во Советот за радиодифузија. Од владејачката партија изречно велат дека овие информации доаѓаат од опозицискиот СДСМ и дека станува збор за обид да се покаже дека ВМРО-ДПМНЕ би прифатил и нереални барања. Наспроти ова, партијата на Заев и натаму инсистира на петте барања кои лидерот ги изнесе на средбата со Груевски, особено потенцирајќи дека не се откажуваат од клучното барање за техничка влада.
Според ВМРО-ДПМНЕ, всушност, станува збор за идеја што ја изнел Заев на средбата со Груевски, а сето тоа во рамките на барањето за техничка влада, што било одбиено од лидерот на ВМРО-ДПМНЕ. Од партијата на Груевски се децидни дека ќе нема разговори се` додека Заев инсистира на техничка влада и ќе нема средба меѓу двајцата лидери додека нема политички договор. Очекувањата се дека за дијалогот може да помогне и посредникот од Белгија да посредува за раздвижување на политичкиот дијалог. Официјално, од ВМРО-ДПМНЕ велат дека информациите во јавноста за ДЗР и слично во јавноста ги пушта СДСМ и оти ги разбираат како неприфатлива уцена.
За СДСМ, пак, не инструментите, туку темите вклучени во преговорите се суштината во процесот. Сите пет точки од пакетот што СДСМ ги извади на преговарачката маса се еднакво важни за партијата, а особено техничката влада, без која опозицијата нема намера да преговара.
Сепак, барањето за раководни позиции во Државниот завод за ревизија, антикорупциската комисија и во Советот за радиодифузија, неофицијално, се дел од предлозите што СДСМ ги ставил на маса и тоа во делот за одвојување на партијата од државата. Од опозициската партија велат дека овие барања во никој случај не значат замена на нивното барање за техничка влада