Демонстрантите од протестите за „Монструм“ пред судСкопје, 21 јули 2014 (МИА) - Во Основниот суд Скопје 1 денеска започна судењето на осумтемина демонстранти кои протестираа на 4 јули во Скопје, поради пресудата за случајот „Монструм“.
Јавното обвинителство ги товари лицата Ф.З., А.Р., М.Б., Р.В., А.А., Е.И., И.М., и Р.Б. за насилство на протестите кон полициски службеници во кои повредиле 20 полициски службеници од кои четворица со тешки телесни повреди, како и за оштетување на имотот на Основниот суд Скопје 1 и Основниот суд Скопје 2 во вкупна вредност од над еден милион денари.
Одбраната и обвинетите ги отфрлија обвиненијата. Обвинетите се изјаснија дека не се виновни, а одбраната смета дека обвинителство нема цврсти докази против обвинетите и оти некои од обвинетите лица воопшто не се наоѓале на местото на настанот, додека дел од нив биле само физички присутни во околината и мирно протестирале.
Судскиот процес за осумтемина демонстранти продолжува утре.
За случајот „Монструм“ шестмина од обвинетите добија доживотни затворски казни поради обвиненија за тероризам за петкратнотото убиство кај Смилковско Езеро. Пред две години, пред Велигден, беа убиени четири момчиња и еден возрасен човек.
|