Каналот на Дервенскиот поток во Велес повторно претрупан со ѓубре Велес, 23 јули 2014 (МИА) - Каналот на Дервенскиот поток во стариот дел од левата страна на Велес, а кој само пред една недела беше целосно исчистен од екипите за хигиена при ЈКП „Дервен“ од Велес, повторно е претрупан со секаков вид смет.
Тодорка Андреевска, портпарол на ЈКП „Дервен“ за МИА изјави дека во оваа еколошка акција нивните екипи собрале дури 40 трактори смет и земја или вкупно 90 метри кубни смет и земја.
- Во оваа населба, како и во останатите делови од Велес сметот од домаќинствата се собира двапати неделно. Но, за жал има некои несовесни граѓани кои наместо во канти сметот го исфрлаат директно во Дервенсиот поток. Со тоа не само што ја загадуваат животната средина и го нарашуваат убавиот изглед, тоа претставува и опасност за ширење на заразни болести, посебно во овие летни месеци, предупредува Андреевска.
Таа воедно апелира до граѓаните од овој дел на Велес, но и останатите делови на градот сметот да го исфрлаат исклучиво во контејнерите и кантите, а кои потоа редовно двапати неделно ги чистат екипи на ЈКП „Дервен“.
|