Атина, 24 јули 2014 (МИА) – Посетата на медијаторот Метју Нимиц на Скопје и Атина ќе биде уште едно од вообичаените патувања на кои тој ќе го даде своето мислење, кое е исто во изминатите 20 години.
Ова денеска го пишува грчкиот весник „Етнос“ во кус коментар под наслов „Нов преговарач“.
- Оваа посета, сепак, ќе има нов елемент, Нимиц во Скопје ќе се сретне со новиот преговарач, 34-годишниот Васко Наумовски, кој е личен избор на премиерот Никола Груевски за македонски амбасадор во Вашингтон, пишува весникот.
Следејќи ја грчката политика на напади и навреди кон македонската страна, „Етнос“ на крајот додава дека „судејќи според неговата млада возраст“, првата средба на Наумовски со Нимиц и грчкиот преговарач Василакис, „веројатно ќе биде вовед во карактеристиките“.