Ново Село ќе ја одбележи илјада годишнината од Беласичката битка

Струмица, 25 јули 2014 (МИА) - Со голем народен собир и откривање на спомен одбележје во вторник на 29. јули во месноста Пирго, крај село Мокриево, општина Ново Село ќе ја одбележи илјада годишнината од големата Беласичка битка.

Како што изјави градоначалникот на Ново Село, Блажо Велков, одбележувањето на овој историски настан е можност да им се оддаде почит на војниците на македонскиот цар Самуил, кои пред 10 векови се бореле во овој дел на Македонија.

- Во знак на сеќавање на Беласичката битка во месноста Пирго ќе откриеме спомен одбележје, а овој настан со своето учество ќе го овеличат Воениот оркестар и Баталјонот за почести и опслужување на АРМ, рече градоначалникот Велков.

Во битката на Беласица, во клисурата Клуч, во 1014 година византискиот војсководец Василиј ја поразил македонската војската, а заробените војници ги ослепел и ги пратил кај цар Самуил.