Во Велес синоќа концерт одржа ансамблот на Пеце Атанасовски

Велес, 29 јули 2014 (МИА) - Во рамки на манифестацијата „Топол културен бран“ синоќа во Велес концерт одржа ансамблот на „Пеце Атанасовски“ во придружба на женската пејачка група. Оркестарот е составен од традиционални музички инструменти: гајда, кавал, тапани,тамбура и други на кои свират преработки на македонска народна музика.

Концертот беше посветен на чалгијата која ја музицира староградската музика, а во дел од концертот имаше и изворни песни од македонските села.

- Целта ни е оваа музика да ја оживееме и вратиме од заборав за новите генерации да ја слушнат и засакаат, изјави Ристе Солунски, раководителот на ансамблот кој свири гајда и кавал.

Ансамблот на Пеце Атанасовски каде што и тој учел свирење постои дваесет години, од кои десетина години не свиреле.

- Повторно заживува последниве години,а целта е да продолжи да ја популаризира изворната македонска музика од македонските села и градови.Досега има издадено еден албум,а во планови е да издаде и нов,појасни Солунски.

На синоќешниот концерт настапи и женската пејачка група составена од три, а синоќа настапија двете вокалистки, Ружица Кочовска и Инес Стаменковска Ристеска.

- Ние како и поголемиот дел од членовите на нашиот ансамбл сме аматери вљубеници во музиката освен еден член а кој е академски музичар и нашето музицирање е од љубов кон изворната народна музика. Целта ни е преку нашите настапи и концерти да ја негуваме автентичната македонска традиционална музика, изјави Инес Стаменковска Ристеска.