Скопје, 29 јули 2014 (МИА) - До решение за прашањето за името може да се дојде само со конструктивност од двете страни и придржување до рамката во која се водат разговорите - резолуциите на Советот за безбедност, Времената спогодба и на пресудата од Меѓународниот суд на правдата во Хаг.
Ова го истакна претседателот Ѓорге Иванов на денешната средба во Скопје со амбасадорот Метју Нимиц, специјален пратеник на генералниот секретар на Обединетите нации за прашањето за разликата околу името.
Во тој контекст, претседателот Иванов повика на почитување на меѓународното право и доследност кон меѓународно преземените обврски.
Иванов, како што соопшти неговиот кабинет, со медијаторот Нимиц ја разгледаа актуелната состојба во разговорите за надминување на ова прашање.
Поздравувајќи го ангажманот на амбасадорот Нимиц, претседателот Иванов ја реафирмираше државната позиција на Република Македонија и посветеноста за изнаоѓање на заеднички прифатливо решение за разликата околу името.
- Како и досега, и натаму Република Македонија активно, конструктивно и со добра волја ќе учествува во процесот, со цел изнаоѓање на заемно прифатливо решение за разликата околу името, рече претседателот Иванов.
На средбата, на која присуствува министерот за надворешни работи Никола Попоски и новиот пратеник во разговорите за надминување на разликата околу името Васко Наумовски, претседателот Иванов ја истакна подготвеноста на македонската страна за средби на највисоко ниво и интензивирање на дијалогот.
По средбата со претседателот Иванов, специјалниот претставник на Обединетите Нации, Метју Нимиц ќе се сретне со премиерот Никола Груевски.