Делегации го посетија Смилево и споменикот на Даме Груев Крушево, 1 август 2014 (МИА) - Градоначалникот на Крушево Ѓорѓи Дамчески, повеќе делегации и претставници од Советот на манифестацијата „10 дена Крушевска република“ денеска ја посетија спомен куќата на Смилевскиот конгрес во селото Смилево и споменикот на Дамјан Груев.
Свежи цвеќиња положија и почит му одадоа на Груев пред неговиот споменик градоначалникот Дамчески, членовите на крушевскиот совет Агапи Чункоска и Сашо Бончаноски, потпретседателот на манифестацијата „10 дена Крушевска република“ Маноил Јаковлевски, членот на советот на манифестацијата Миле Грозданоски, како и делегација на ВМРО-ДПМНЕ од Крушево.
- Смилевскиот конгрес е претходница на востанието, а ние крушевчани сме горди на истористите настани и на делото на Даме Груев на кого му се поклонуваме пред споменикот, рече градоначалникот на Крушево Ѓорѓи Дамчески.
|