Во гостиварската населба Циглана ќе се гради манастир Преображение Христово

Скопје, 19 август 2014 (МИА) - Со архиереска литургија со која чиноначалствуваше митрополитот тетовско-гостиварски г. Јосиф, во месноста Црн Врв во близина на населбата Циглана, беше осветено местото на кое ќе се гради манастирот Преображение Христово.

На црковно народниот собир, претставниците на иницијативниот одбор ја побараа поддршката од жителите од овој дел на општината за изградбата на светилиштето. Митрополитот г. Јосиф, честитајќи го празникот Преображение Христово се обрати до верниците кои беа дојдени.

- Сега цврсто верувам дека овде ќе има манастир. Тука, вие жителите од овие населби и градот, ќе имате свое место на преображение, место каде што ќе најдете молитва, мир и благослов. Освен на мештаните, им заблагодарувам на локалната власт и градоначалникот, кој даде „зелено светло“ за ова свето место, рече митрополитот г. Јосиф.

Новиот манастир се гради на парецела сопственост на Крсте Спасеноски од гостиварско Беловиште, која ја отстапи на МПЦ ОА.