Претставник од Делегацијата на ЕУ во посета на Општина Гевгелија

Скопје, 20 август 2014 (МИА) - Развојот на Општина Гевгелија, евроинтеграциските процеси и прекуграничната соработка со општините од Грција, беа теми на денешната средба меѓу политичкиот комесар на Делегацијата на ЕУ во Македонија, Петра Андерсен и гевгелискиот градоначалник Иван Франгов.

- Гевгелија е отворен град во непосредна близина на два меѓународни гранични премина. Граничи со земја членка на ЕУ и отсекогаш бил европски, како според условите за живот и стандардот, така и според услугите што ги обезбедува локалната самоуправа. Настојуваме и натаму да го задржиме ваквиот тренд преку примена на европски стандарди и унапредување на прекуграничната соработка. Меѓутоа во последно време кај дел од граѓаните се чувствува замореност од долгото чекање пред вратата на ЕУ, истакна градоначалникот Франгов.

На средбата беше оценето дека успешната прекугранична соработка значително придонесува за унапредување на односите меѓу Македонија и Грција преку настапите со заеднички проекти во рамки на ИПА програмата.

Андерсен го посети и одводниот канал за атмосферски води во Негорци, којшто заедно со префектурата Пела од Грција се гради со финансиска помош од ЕУ преку ИПА програмата.