Со концертот „Апасионато“ заврши „Топол културен бран“ во Велес

Велес, 28 август 2014 (МИА) - Со концертот насловен „Апасионато“  на виолинистката Пламенка Трајковска и нејзиниот гудачки квартет синоќа во амфитеатарот на Младинскиот парк во Велес заврши манифестацијата „Топол културен бран“ на Министерството за култура и Општина Велес.

Беа изведени композиции од истоимениот албум на Трајковска, кој претставува спој на класичната музика од познати композитори и современиот музички стил.

По концертот, Трајковска за МИА изјави дека иако долги години работат на популаризација на класичната музика, сепак сметале дека во едно ново, современо време мора да и се даде малку ритам на овој тип на музика за да биде поприфатена од публиката.

- Сметам дека многу поуспешно можеме да ја приближиме музиката доколку ја интерпретираме непосредно пред граѓаните на отворено, а ваквите концерти се блиски до луѓето, истакна Трајковска.

Гудачкиот квартет, освен Пламенка Трајковска на виолина, го сочинуваат и Наташа Диденко на виолина, Сања Смилевска на виола и Александра Петковска на виолончело.

Концетот „Апасионато“ веќе е прикажан во повеќе македонски градови, а истоимениот албум се презентира и во странство.