Реконструиран дел од објектот на гимназијата и хемиското училиште во Велес

Велес, 29 август 2014 (МИА) - Во текот на летниот распуст извршена е внатрешна реконструкција во зградата каде што заеднички работат гимназијата „Кочо Рацин“ и хемиското училиште „Димитрија Чуповски“ во Велес.

Целосно е реконструирано приземјето на зградата каде се реновирани училниците и ходникот за што двете училишта одвоиле 200 илјади денари.

Директорот на хемиското училиште Горан Јанков денеска на прес-конференција информираше дека е направена и дезинфекција со белење на ѕидовите, а извршени се и одредени градежни работи.

Согласно четиригодишниот акционен план, како што посочи директорот на гимназијата „Кочо Рацин“, Сашо Андреевски, предвидено е да се направи целосна реконструкција на сите спратови во училишната зграда, која не е реновирана од 1956 година.

- За време на летниот распуст следните години ќе се врши реконструкција на внатрешноста на зградата, на ѕидовите, ходниците и училниците со цел да создадеме најдобри услови за учениците и професорите за успешно изведување на наставата, рече Андреевски, најавувајќи реконструкција и на тоалетите.