Скопјанка вчера напладне се породила пред Гинеколошката клиника во скопски Чаир, јави Прес 24, повикувајќи се на очевидци на настанот.
Според порталот, жената со автомобил дошла пред болницата и затоа што не можела да излезе од возилото, веднаш биле повикани гинеколозите, но тие не излегле да ѝ пружат помош.
- Не можеше да излезе од кола, ниту еден од докторите не излегуваше на помош, иако беа повикани. Во тој момент, жената се породи во кола и бебето и падна на бетонот. Да не бевме јас и уште еден човек, бебето ќе се останеше на бетонот и никој немаше да го чепне – изјавил очевидец, кој додал дека крвта веднаш била избришана од плочникот.
И од болницата го потврдиле настанот но одбиле да кажат во каква состојба се мајката и бебето иако, неофицијално, жената по породувањето се онесвестила.
Наводно, кога дома ја фатиле породилните болки, жената била сама и затоа излегла пред својата куќа и го запрела првиот автомобил кој доаѓал. Човекот застанал и ја однел во болница, но бебето не „издржало“ до породилната сала, за да дојде на свет.