Тетово, 12 октомври 2014 (МИА) - Актуелниот претседател на Демократската партија на Албанците (ДПА) Мендух Тачи денеска беше реизбран на оваа функција со мандат во следните четири години.
Ова е една од одлуките на Шестиот конгрес на партијата што се одржува во Центарот за култура „Иљо Антески Смок“ во Тетово, со присуство на 695 делегати.
Во својот говор пред присутните Тачи истакна дека ја прифатил кандидатурата за реизбор од ограноците бидејќи, како што рече, за политичката битка што треба да продолжи првиот човек односно водачот не може да се откаже самоволно.
Според Тачи, Албанците во Македонија се заморени од деградирањето на нивните политички и економски права, условите за живот, застојот во процесот на интеграција во ЕУ и НАТО за што тој ја обвини владејачката ДУИ.
- ДПА постојано е цел на напади, и од албански и од неалбански центри, кои неретко корумпираат членови на ДПА што потоа ги злоупотребуваат, но ДПА нема да попушти и да се растури поради тоа, зашто партиите ја чинат луѓето што ја поддржуваат и веруваат во нејзината програма, рече Тачи во својот говор.
Пред паузата на конгресот делегатите ја усвоија програмата на ДПА со која се реафирмира политичката платформа од 12 точки за нов договор помеѓу Македонците и Албанците, ги усвоија измените на Статутот со што на потпретседателите и генералниот секретар им се овозможува реизбор на функцијата по четири години, а ги изгласаа и 70-те членови на Централниот одбор како највисок партиски орган помеѓу два конгреса и членовите на Надзорниот одбор.