Скопје, 21 октомври 2014 (МИА) - СДСМ денеска обвини дека граѓаните следната година ќе плаќаат повисоки казни затоа што во Буџетот за 2015 година што беше усвоен на вчерашната собраниска седница е предвидено да се соберат 300 милиони евра по основ на такси и глоби.
Васко Ковачески, член на партиската Комисија за економија, изјави дека се работи за 40 милиони евра повеќе од лани што треба да влезат во Буџетот по основ на казни.
Тој посочи дека мајсторите и занаетчиите ќе бидат казнети со 1.500 евра ако еднаш бидат фатени дека работат без лиценца, а ако по втор пат бидат фатени ќе треба да платат казна од 6 до 9 илјади евра.
Според Ковачески, двојно се зголемени и казните во сообраќајот, а казни ќе плаќаат и лекарите кои ќе одбијат обука во странство.
СДСМ бара граѓаните прво да добијат опомена за сторениот прекршок, а да бидат казнети при повторувањето на прекршокот, износот на казни да се намали за најмалку 50 проценти и да има скалест пристап во казнената политика според приходите на граѓаните и на фирмите.
- Принципот „прво опомена” да важи и за присилна наплата на долгот, со што ќе се зачува финансиската дисциплина, но и ќе се избегне блокирањето на сметките на даночните обврзници, рече Ковачески.