Апел до сите вие кои се грижите за бездомно куче кое не е стерилизирано!
Здружението за заштита на животни Анима Мунди објави повик до сите граѓани за бесплатна стерилизација на маалските бездомни кучиња.
Оваа акција е организирана во партнерство со ЕНПА, најстарата организација за заштита на животни во Италија, која заедно со нашето здружение, обезбедија помош за стерилизација на 200 бездомни кучиња во Скопје.
Покрај бесплатната стерилизација, ќе биде овозможено и постоперативно сместување од 24 часа.
Сите граѓани кои сакаат да ги стерилизираат маалските кучиња може да го контактираат здружението преку e-mail: anima.mundi.sk.mk@gmail.com и да резервираат термин.
200 кучиња е првичната бројка за кои ЕНПА овозможува бесплатна стерилизација, а од Анима Мунди веруваат дека ваквата акција ќе продолжи и по завршувањето на овој проект.
- Целта на проектот е хуман третман на бездомните животни за кои се грижиме ние љубителите на животни, како и практикување на граѓанска одговорност зошто со само еден чекор, стерилизација на едно кутре, го затвараме кругот на раѓањето на илјадници нови бездомни животни на улиците и нивното страдање и усмртување; правиме хумано дело кое е во интерес и на животните и на нашата заедница. Стерилизираните кутриња имаат смирен хормонален статус и не се здружуваат во глутници, нема мајки кои ги бранат своите младенчиња, се намалува бројката на луѓе на кои им пречат животните.. Стерилизацијата е полезна за здравјето на животните и превенира бројни смртоносни заболувања (канцер на матка и млечни жлезди) така што стерилизираните кутриња живеат поздраво и подолго, се вели во повикот на Анима Мунди.