Пратеникот Владимир Ѓорчев на Парламентарен семинар во МадридСкопје, 31 октомври 2014 (МИА) - Владимир Ѓорчев, пратеник и претседател на собраниската Комисија за политички систем и односи меѓу заедниците, учествува на Парламентарен семинар на тема „Улогата на националните парламенти во имплементацијата на пресудите на Европскиот суд за човекови права", што денеска во организација на Парламентарното собрание на Советот на Европа се одржува денеска во Мадрид, Кралството Шпанија.
Главната цел на овој семинар, како што соопшти собраниската прес-служба, е да се поддржат членовите на националните парламенти во подобрување на нивното знаење на Европската конвенција за човекови права и да се спроведе ефикасно имплементирање на пресудите на Европскиот суд за човекови права, како и да се разгледа ефикасноста на постојните парламентарни структури и механизми за проверка на стандардите на Конвенцијата.
ПС на СЕ во 2011 година донесе Резолуција за „Националните парламенти: гаранти на човековите права во Европа", во која е укажано дека во однос на спроведувањето на пресудите на Европскиот суд за човекови права, Парламентарното собрание на Советот на Европа посочува на позитивните примери во неколку земји-членки, особено во Обединетото Кралство, Холандија, Германија, Финска и Романија, кои имаат поставено парламентарни структури за следење на спроведувањето на пресудите на Судот".
На овој семинар, покрај членови на ПС на Советот на Европа, поканети да учествуваат се и парламентарци од: Албанија, Ерменија, Азербејџан, Австрија, Босна и Херцеговина, Бугарија, Кипар, Франција, Грузија, Унгарија, Латвија, Литванија, Молдавија, Србија, Словачка и Турција.
|