„Зло Време“ на Раде Силјан промовирана во Бугарија

Скопје, 31 октомври 2014 (МИА) - Поетската книга „Зло време“ од македонскиот поет Раде Силјан вчера беше промовирана во прес-центарот на Бугарската телеграфска агенција - БТА во Софија пред стотина присутни писатели, преведувачи и новинари. Преводот на бугарски јазик е на Владимир Луков, а во издание на издавачката куќа „Богианна“, чиј главен уредник е Бојан Ангелов, актуелен претседател на Сојузот на бугарските писатели, соопшти издавачот „Матица македонска“.

За делото говореше литературната критичарка академик Благовеста Касабова, која констатира дека „Силјан спаѓа во редот на автентичните поети и дека неговите лирски пораки се со универзални вредности“.

На свеченоста по повод промовирањето на поетската книга на македонскиот поет Раде Силјан, Сојузот на слободните уметници на Бугарија му ја додели меѓународната наградата „Амбасадор на пријателството“ за неговиот придонес во развојот на бугарско-македонските куклтурни врски.

На врачувањето на наградата присуствувале заменикот амбасадор на Република Македонија во Република Бугарија, Гоце Георгиевски и директорот на Македонскиот културен центар, Васко Шутаров.