Јанкулоска на генералното собрание на Меѓународната анти-корупциска академија во БакуСкопје, 20 ноември 2014 (МИА) - Постои потреба од засилување на казнената политика во делот на корупцијата и коруптивното однесување за таа да соодветствува на заканите по нашите земји, олицетворени во овој вид криминал. Само со промовирање на „нулта толеранција“ и строги санкции кон престапниците, може да обезбедиме општество ослободено од корупција и коруптивно однесување.
Ова, меѓу другото, го истакна министерката за внатрешни работи Гордана Јанкулоска во своето обраќање на Третата сесија на генералното собрание на земјите членки на Меѓународната анти-корупциска академија (IACA) која се одржува во Баку, Азербеџан, соопшти МВР.
Јанкулоска во своето обраќање нагласи дека институциите во Македонија доследно ги реализират нивните надлежности во сузбивање на корупцијата и коруптивното однесување, работејќи напоредно како на планот на превенција, така и на полето на нивно санкционирање.
Еден од стратешките приоритети на МВР е борбата против корупцијата меѓу вработените во полицијата, како предуслов за враќање на довербата од граѓаните и основен услов за владеење и почитувањето на законот, подеднакво за сите. Во тој контекст, Јанкулоска напомена дека Секторот за внатрешна контрола и професионални стандарди, како внатрешен механизам на Министерството, во континуитет настојува да ја зголеми својата ефикасност и ингеренциите. Како пример, посочи дека годинава се детектирани 19 кривични дела поврзани со давање и примање поткуп, како и со примање награда за противзаконско влијание, за кои се пријавени 23 вработени. Во делот кој се однесува на „злоупотреба на службената положба и овластувањата“ процесуирани се 41 пријава против 71 лице, а во 16 од овие случаи е детектирана таканаречената корупција од „висок профил“.
Министерката Јанкулоска на маргините од Третата сесија имаше билатерална средба со домаќинот на овој настан, азербеџанскиот министер за внатрешни работи Рамис Усубов. На средбата е констатирано дека досегашната соработка меѓу двете земји, како и двете институции, се одвива во нагорна линија особено преку заедничката партиципација во разните меѓународни иницијативи и организации, Советот на Европа и НАТО програмите, при што заеднички е оценето дека постои простор за натамошно интензивирање и продлабочување на билатералната и на мултилатералната соработка. Во тој контекст на средбата е афирмирана иницијативата за скорешно потпишување Договор за полициска соработка меѓу двете земји во којшто би биле опфатени повеќе сфери на активности од заеднички интерес, се наведува во соопштението од МВР.
|