Донесена петгодишната Програма за развој на Источно-планскиот регионШтип, 20 ноември 2014 (МИА) - Советот на градоначалници на општините од Источно-планскиот регион (ИПР) денеска ја донесе Програмата за развој на ИПР во периодот 2015 - 2019 година.
- Не можам да издвојам кои од проектите се значајни, но можам да кажам дека патната инфрструктура, туризмот и развојот на земјоделството се едни од поголемите приоритети. Владата за овој регион веќе го реализира автопатот Штип-Миладиновци, очекуваме да се реализира и експресниот пат Штип-Кочани, како и до бугарска граница и до Берово, а во делот на туризмот значајно е да ги издвоиме изградбата на скилифт и жичарница на Пониква и колекторски систем за овој туристички центар, изјави Претседателот на Советот Тони Тоневски.
Директорката на Центарот за развој на ИПР Драгица Здравева рече дека меѓу најзначајните проекти што треба да се реализираат е регионалната депонија, но и за подземниот катастар повторно се создадени контаките со словенечката влада за грант од еден милион евра. Значајни се, додаде, и проектите за заштита на животната средина за наредните години кои ги финансира швајцарската влада.
Според државниот секретар во Министерството за локална самоуправа Билјана Цветановска Гугоска, донесувањето на овие програми за регионите во земјава е значајно, а средства за реализација на проектите ќе има преку фондовите на ЕУ, министерства, но и преку Бирото за рамномерен регионален развој. Огласот за аплицирање се очекува во декември.
- Околу 110 милиони денари се издвоени од Буџетот за реализирање проекти преку Бирото за рамномерен регионален развој, а кои ќе бидат реализирани преку проекти во рамките на регионите, истакна Цветановска Гугоска.
Изработката на Програмата за развој на ИПР финансиски е подржана од ГИЗ РЕД, а во нејзината подготовка беа вклучени општините, бизнис секторот, неладини организиации и експерти.
|