Скопје, 24 ноември 2014 (МИА) - Претседателот Ѓорге Иванов и претседателот на Големото Национално Собрание на Турција Џемил Чичек на денешната средба изразиле задоволство од одличните односи и континуираниот нагорен тренд во соработката помеѓу Република Македонија и Република Турција на сите нивоа.
Поздравувајќи ја досегашната парламентарна соработка, претседателот Иванов изрази надеж дека и во наредниот период парламентарната соработка ќе даде свој придонес во натамошното јакнење на односите и збогатувањето на соработката.
Како што соопшти Кабинетот на претседателот, Иванов изразил благодарност за принципиелната поддршка од Турција за членство на Македонија во НАТО.
- Високо го вреднуваме фактот што Република Турција е долгогодишен и гласен поддржувач и промотор на стратешките цели на Република Македонија, рече претседателот Иванов на средбата.
Двајцата соговорници ја поздравија економската соработка која бележи нагорен тренд, со очекување за нејзино интензивирање. На средбата е разговарано и за интензивирање на соработката во сферата на одбраната и безбедноста, културата, образованието, како и на мултилатерален план.
Претседателот Иванов изрази очекување за зајакната соработка во рамките на Алијансата на цивилизациите, имајќи предвид дека Турција е еден од основачите на оваа иницијатива во Обединетите Нации.
Претседателот на Големото Национално Собрание Чичек нагласи дека Македонија е важен партнер на Турција и дека, како и досега, Македонија може да смета на поддршка од Анкара.
На средбата се разменети мислења и информации и за регионалните состојби.