Градоначалникот на Охрид се сретна со претставници на менаџментот на кинески „Хуавеј“

Охрид, 26 ноември 2014 (МИА) – Градоначалникот на Охрид Никола Бакрачески во рамки на работната посета на Кина оствари средба со претставници на големата кинеска и светска компанија за телекомуникациска опрема и информатичка технологија „Хуавеј“, предводени од заменикот-претседател Ватер Су.

На средбата Бакрачески бил информиран дека „Хуавеј“  има 21 институт за истражување и развој во  Кина, Америка, Канада, Пакистан, Велика Британија, Франција, Германија, Колумбија, Шведска, Ирска, Индија, Русија и Турција, како и дека само за инвестирање во истражувања и развој компанијата минатата година инвестирала пет милијарди долари.

На работната вечера по средбата Бакрачески пред менаџерскиот тим на „Хуавеј“ ги презентирал можностите и олеснувањата што Владата на Република Македонија и Локалната самоуправа ги нудат за привлекување странски инвестиции, како и за потенцијалите на Охрид за евентуален влез на кинескиот гигант со инвестиции во охридското стопанство.

„Хуавеј“ според обртот на производство во 2012 година ја престигна и компанијата „Ериксон“. Компанијата на почетоците од работењето своите активности ги има фокусирано на изработка на опрема за телефони, за подоцна да го прошири бизнисот во областа на телекомуникациска опрема, обезбедување оперативни и консалтинг услуги, како и опрема за фирми во и надвор од Кина. „Хуавеј“ произведува различни уреди за комуникација за широка потрошувачка, со 140 илјади вработени, од нив речиси половината фокусирани во истражувачка дејност и развој.