Средба на битолскиот градоначалник Талески и митрополитот г. ПетарБитола, 17 декември 2014 (МИА) - Општина Битола и преспанско-пелагониската епархија ги почнаа програмските свечености посветени на Свети Нектариј Битолски – заштитникот на градот.
Традиционално, битолскиот градоначалник Владимир Талески денеска приреди прием за митрополитот на преспанско-пелагониската епархија и администратор австралиско-новозеландски г. Петар, вечерва во битолскиот театар ќе се одржи свечена духовна академија, а утре во Храмот „Св. Великомаченик Димитриј“ ќе има утринска богослужба и свечена Литија.
- Со голема почит го славиме нашиот патрон Свети Нектариј Битолски, а наскоро во централното градско подрачје ќе изградиме и храм посветен на заштитникот на градот, рече меѓудругото градоначалникот Владимир Талески на прес - конференцијата.
- Забележано е дека Битола го воспита Нектариј, прекрасниот горостас на нашата православна црква и затоа битолчани треба достоинствено да се оддолжат и го почитуваат неговото дело приклучувајќи се на вечерната богослужба и утринската литија, повика митрополитот г. Петар.
На новинарско прашање во врска со актуелните состојби со австралиската епархија, јавните барања на Игор Александров и одлуките на Светиот архиерејски синод, митрополитот г. Петар рече „приказната е завршена“.
- За тој случај докази има повеќе отколку што треба за тоа што е направено и одлуката е донесена. Решението е потврдено и тоа поглавје е затворено еднаш за секогаш, одговори митрополитот г. Петар.
|