Лустриран Ѓорѓи Спасов, поранешен министер и амбасадорСкопје, 19 декември 2014 (МИА) - Комисијата за верификација на фактите го лустрираше поранешниот министер за правда и поранешен амбасадор на Македонија во Бугарија и Молдавија, Ѓорѓи Спасов.
Членовите на лустрациската комисија утврдиле дека Спасов соработувал со службите за безбедност во осумдесеттите години и оти неговото име го имало во три лични досиеја во Државниот архив.
Од документите кои се објавени на веб-страницата на Комисијата, може да се види дека Спасов давал податоци за лица поради анархолиберализам, за лица кои сакале да се воведат полиберални сфаќања во општеството, односно досиејата биле формирани поради идеолошки и политички причини.
Во решението на Комисијата за верификација на фактите се вели дека Ѓорѓи Спасов како асистент во Институтот за социолошки и политичко правни истражувања, давал информации за лица од весникот „Студентски збор“ кои делувале од анархолибералистички позиции, сакале да воведат полиберални ставови во веснико што ќе ги интересираат граѓаните, а иницирале и собирање потписи во градот во знак на поддршка на синдикалната организација „Солидарност“.
Спасов е и поранешен генерален секретар на опозициската партија СДСМ и сопственик на агенцијата „Рејтинг“.
Комисијата за лустрација денеска објави дека бил лустриран и поранешниот шеф на битолската испостава на СДБ, Ице Дамчевски, кој неа собирал и издавал наредби за следење на лица кои биле од интерес на службата.
|