Ново повеќенаменско игралиште во прилепската гимназија „Мирче Ацев“ Прилеп, 20 декември 2014 (МИА) - Во прилепската гимназија „Мирче Ацев“ денеска беше пуштено во употреба повеќенаменското игралиште, проект на Агенцијата за млади и спорт за изградба на 100 повеќенаменски игралишта низ целата држава. На свеченото пуштање во употреба на повеќенаменското игралиште присуствуваа министерот за транспорт и врски Миле Јанакиески, директорот на Агенцијата за млади и спорт Марјан Спасески и градоначалникот на Прилеп Марјан Ристески. Директорот на Агенцијата Спасески во обраќањето истакна дека игралиштето е 35-то по ред што се пушта во употреба и оти очекува да биде исполнето од утринските до вечерните часови со ученици и спортисти. - Повеќенаменското игралиште кое го пуштаме во употреба е 35-то по ред и е изградено според светски стандарди со димензии 45×28 метри и ќе може да се користи за играње мал фудбал, серва, кошарка, тенис и други игри и ќе биде наменето за учениците од средното училиште „Мирче Ацев“ и граѓаните на Општина Прилеп. После завршувањето на часовите, игралиштето ќе може да го користат рекреативците и спортистите на градот Прилеп.Искористеноста на овие игралиште очекувам да биде од утринските до вечерните часови и граѓаните на општина Прилеп своето слободно време да го поминуваат спортувајќи рекреативно токму на ова игралиште, истакна Спасески. Тој потенцираше дека игралиштето ќе одигра голема улога во оттргнувањето на младите од пороците на 21 век. - Младите се иднината на државата и поради тоа сакаме и мораме да ги оттргнеме од пороците на 21 век и затоа ова игралиште очекувам да има големо влијание во борбата против пороците, рече меѓу другото Спасески. Претходно, Агенцијата за млади и спорт ги изгради и ги предаде во употреба фудбалските игралишта во Тополчани и кај Могилата кои се од проектот изградба на 50 фудбалски игралишта низ целата држава.
|