Во Кочани одбележана годишнината од раѓањето на Рацин Кочани, 22 декември 2014 (МИА) - Во Јавната општинска установа библиотека „Искра“ во Кочани со пригодна свеченост денеска беше одбележана годишнината од раѓањето на истакнатиот македонски поет Коста Солев Рацин. Ученици од кочанските основни и средни училишта под менторство на професорите Љупка Стоименова и Доне Донев, рецитираа стихови од Рацин на македонски,англиски,германски,француски и шпански јазик. Во изложбениот салон на библиотеката беа изложени книги од и за Рацин од фондот на кочанската библиотека. - Чествувањето за Рацин е во три варијации, поезија, книги и изложба со што ги одбележуваме 22 декември денот на раѓањето на Коста Солев Рацин, 75 годишнината од излегувањето на стихозбирката „Бели мугри“ и 50 години Рацинови средби во Велес, изјави Сузана Ѓоргиева, директор на кочанската библиотека. Марин Клифов, виш кустос во Народниот музеј во Велес потенцира дека изложбата е подготвена во рамки на одбележувањето на 50 годишнината од Рациновите средби во Велес и на неа се содржани документи и фотографии за оваа значајна културна манифестација во изминатите години. Чествувањето за Коста Солев Рацин во Кочани е дел од програмата на Јавната општинска установа Библиотека „Искра“ за 2014 година.
|