Скопје, 14 декември јануари 2014 (МИА) - Членови на Студентскиот и на Професорскиот пленум, како и граѓани кои ги поддржуваат, попладнево се собраа пред Собранието на Република Македонија за да го искажат своето несогласување со предложените измени на Законот за високо образование, што пратениците треба да ги гласаат на денешната седница.
Учесниците на протестот носат транспратенти, а прават и „маратон пародија на носење закони“. Улицата пред Собранието е затворена за сообраќај, а околу зградата има засилено полициско присуство.
Претставници на Студентскиот пленум најавија дека ако Собранието ги донесе измените на Законот за високо образование, ќе ги практикуваат сите вонинституционални методи што постојат - бојкот, блокирање и преземање на универзитетот... Според нив, донесувањето на измените на Законот ќе значи укинување на автономијата на универзитетот и кршење на Уставот.
Дополнетиот предлог закон за изменување и дополнување на Законот за високото образование е 28 точка на денешната 31. пленарна собраниска седница.