Во Демир Капија бројни оштетувања од невремето

Демир Капија, 26 јануари 2015 (МИА) - Бројни оштетувања на објекти, улици, патишта и друго има во општина Демир Капија како последица на невремето што го зафати Демиркаписко во петокот, проследено со поројни дождови, информираше денеска градоначалникот на Демир Капија, Трајче Димитриев.

- Оштетени се одбранбените насипи на реката Бошавица и тоа од вливот во реката Вардар па низводно  во должина од 2 километри  од двете страни на реката, има целосно оштетување на патиштата кои беа изградени врз одбрамбениот насип, загрозени се столбовите на мостот на река Бошавица од натрупаните стебла, пробиен е дел од одбрамбениот насип, соопшти Димитриев.

Тој нагласи дека оштетени се неколку улици во Демир Капија, но и селата Корешница и Клисура, како и локални патишта.  Поплавени беа 
подрумски простории и приземје на објекти во Специјален Завод Демир Капија, текстилен погон, рибник Дошница со помошните објекти, подрумски простории на стамбени објекти во Демир Капија.

Градоначалникот додаде  дека штетите ќе беа многу поголеми доколку во текот на летниот период  не се исчисти и  уреди речното корито на реката Бошавица.