Прогнозно-извештајна служба за земјоделците, иницијатива на кавадарчанецот ЗлатевКавадарци, 27 јануари 2015 (МИА) - Потребна е служба чија задача ќе биде да ги следи климатските промени и да ги подучува земјоделците како да се справат со нив. Ова е иницијативата на кавадарчанецот Диме Златев, магистер по земјоделски науки, со долгогодишно искуство, експерт за лозарство, која денеска јавно ја соопшти.
- Во последните неколку години зачестени се многу негативни климатски услови особено суша, град, поројни дождови и слично кои многу негативно се одразуваат врз приносите и квалитетот на грозјето во лозарството од Тиквешкиот регион. Особено се големи последиците од многу зачестените и многу интензивните врнежи. Како илустрација, од април до септември лани, наврнаа од 800 до 1.200 литри на квадратен метар. Тие предизвикуваат масовни појави на пламеница со енормни размери и штетни последици врз грозјето. Сушите од своја страна исто така се драстичен проблем во одделни сезони и години, појасни тој.
Елементарните непогоди од промената на климата во лозарството и последиците можат да се ублажат или елиминираат, нагласи Златев.
- Потребна е стручна надлежна служба без разлика дали таа ќе биде приватна или државна. Таа ќе треба да ги следи состојбите, да ги проучува и да ги известува лозарите за секоја промена. Би било тоа прогнозно-извештајна служба за да се преземаат навремени и адекватни мерки особено во заштитата од болести, штетни инсекти и плевели, објаснува Златев.
Штетите од дождовите, потсети тој, лани изнесуваат околу 50 милиони килограми винско и околу 5 милиони килограми трпезно грозје. Во вкупна материјално финансиска штета, околу 960 милиони денари или околу 16 милиони евра.
|