Градоначалникот на француската општина Коломбел ја посети општина НовациНоваци, 28 јануари 2015 (МИА) - Градоначалникот на општина Новаци Лазар Котевски и градоначалникот на француската општина Коломбел Марк Потје, денеска ги утврдија заедничките активности за одбележување на 100 годишнината од Првата светска војна.
Двајцата градоначалници потврдија дека културно-историските врски на двете општини претставуваат предност во заедничките цели и намери кои ќе резултираат со развој на меморијален туризам, но и стопанска соработка.
- Коломбел е град во областа на Долна Нормандија кој доби поддршка и од француската влада да соработува со општина Новаци. Млади луѓе од Франција наскоро ќе престојуваат во Новаци со цел да истражуваат, но и да другаруваат со своите врсници и да развиваат долгорочна соработка, истакна градоначалникот Потје за време на денешната посета на општина Новаци.
Градоначалникот Котевски посочи дека општина Новаци има намера да ја развива културно-историската, но и стопанската соработка, и затоа на гостите од Франција им обезбедивме средби со стопанственици од овој крај.
- Соработката со нашите пријатели од Франција е континуирана и се повеќе се зацврстува, а потврда за тоа е суштинската поддршка. Планираме развој на меморијален туризам, младинска соработка и размена, но и стопанска соработка. Одбележувањето на 100 годишнината од Првата светска војна ќе биде на високо ниво и за нас е еден од најважните проекти во овој период, нагласи Котевски.
|