Координативното тело со препораки до општините по најавите за поројни дождовиСкопје, 30 јануари 2015 (МИА) - По најавите за обилни врнежи кои се очекува од вечерва да ја зафатат Македонија, денеска Координативното тело за справување со кризи повторно апелираше до градоначалниците да ги стават во готовност сите расположливи ресурси.
Од градоначалниците се бара и да ги мобилизираат кризните штабови и во нив да ги вклучат претставниците од ЦУК, ДЗС и МВР, а доколку имаат потреба од дополнителна помош во механизација, да се обратат до Дирекцијата за заштита и спасување.
Градоначалниците исто така ќе треба да ги информираат месните заедници за најавената дестабилизација на временските услови и континуирано да се следи водостојот на реките и нивото на акумулациите, а единиците на локална самоуправа да интервенираат на мостовите каде има опасност од задржување големи наноси од надојдените реки.
Граѓаните пак кои сметаат дека се загрозени да се обратат на бесплатниот број 195 на ЦУК, а возачите навремено да се информираат за состојбите на патиштата.
Се препорачува и припадниците на МВР и Министерството за одбрана да бидат подготвени за интервенција, а екипи од ЕВН и ДЗС да воведат дежурни служби.
Според информациите од Управата за хидрометеролошки работи, новиот бран врнежи се очекува да започне денеска по 22 часот. Врнежите ќе продолжат и во текот на ноќта со позасилен интензитет, а се очекува да наврнат од 40 до 60 л/м2. Врнежите ќе бидат изразити во западните и јужните делови на земјата, ќе дува засилен, повремено силен јужен ветер со удари над 80км/час.
Во сабота се очекува кратка пауза за веќе во попладневните часови и вечерта да стигне нов влажен бран. Се очекува овој бран да биде ударен, изразен преку поројни дождови и грмотевици.
- Според информациите за хирдолошката состојба, подземјето веќе е полно со вода така што би немало доволно капацитет целосно да ги прими наредните врнежи од дожд. Се очекува сливните подрачја доста брзо да реагираат на најавените врнежи и водостоите нагло да пораснат, се наведува во соопштението од Координативното тело за справување со кризи.
|