Изградба и обнова на инфраструктурата во БеровоБерово, 27 февруари 2015 (МИА) - Во општина Берово почна реализацијата на Програмата за изградба, реконструкција и одржување на локалните патишта и улици за 2015 година.
- Со средства од општинскиот буџет и од државните фондови годинава на подрачјето на општината ќе бидат изградени и реконструирани повеќе локални патни правци и улици до населените места и до туристичките локалитети, изјави градоначалникот на Берово, Драги Наџински.
Според Програмата, во Берово годинава ќе бидат реконструирани коловозите и ќе се изградат тротоари на улиците „Малешевска„, „Неретва“ , „Страшо Пинџур“, „Маршал Тито“, „Ленинова“ и „Моша Пијаде“. Исто така, ќе се реконструираат пристапните патишта и неколку улици во селата Русиново, Ратево и Будинарци. Од Јавното претпријатие за комунални работи „Услуга“ информираат дека започнатата изградба во 2014 година на улицата „Дамјан Груев“ ќе продолжи и ќе биде асфалтирана од влезот на црквата „Св.Тодор“ до спојот со ул. „Индустриска“ , како и во потегот до Ормански поток.
|