Скопје, 22 март 2015 (МИА) - МВР во последната акција, во еден стан во Гостивар, открила софистицирана опрема која била користена за реализирање на меѓународни разговори, преку мобилната телефонија. Покрај опремата, полицијата затекнала и неколку лица кои се приведени, додека сопственикот на станот, за кој се сомнева дека е сопственик и на опремата, не е најден.
- Целата истрага на секторот за компјутерски криминал беше иницирана по пријава на мобилните оператори во земјава. Тие пријавија дека трпеле штета од незаконски сообраќај во мобилната телефонија, особено во разговорите кон Србија. Во наредниов период ќе се врши и проценка на штетата, а тоа е отежнато бидејќи сим-картичките не се од оператори кои се регистрирани во земјава, изјави помошник министерот за информации во МВР, Иво Котевски.
Во станот во кој е извршен претресот, биле најдени 40 илјади активни СИМ картички од мобилни оператори од целиот свет, а најголем број од запленетите СИМ картички биле од српски мобилни оператори.
Од МВР информираа дека на адресата на која се наоѓа станот нема фирма која би вршела меѓународен сообраќај. Според Котевски, можно е дивиот оператор најверојатно да е подизведувач на услугата на други мобилни оператори кои правото на трансфер на повици го добиле на меѓународни берзи.
Слична опрема деновиве била заплената и во Белград.