Презентирани резултати од проектот „Подобрување на меѓукултурното разбирање во мултиетничките општини во Македонија“

Тетово, 26 март 2015 (МИА) - Асоцијацијата за демократска иницијатива (АДИ) од Гостивар со поддршка на Британската Амбасада во Скопје денеска на Универзитетот на Југоисточна Европа во Тетово ги презентираше резултатите и активностите од проектот „Подобрување на меѓукултурното разбирање во мултиетничките општини во Македонија“, спроведен во периодот (јуни 2013 – март 2015).

Најзначаен резултат од овој проект е подготовката и усвојувањето на стратегии за мултикултурно разбирање во шест полошки општини - Тетово, Гостивар, Кичево, Врапчиште, Јегуновце и Брвеница. Според извршниот директор на АДИ, Алберт Муслиу спроведувањето на локалните стратегии е од голема важност за развој на локалните политики и практики во сферата на мултикултурализмот и истовремено за промоција на моделот и во други општини.

- Наша цел е да се создаде институционален механизам за раководење со ова прашање од локалните власти како најблиски до граѓаните и формирање на комисии за подобрување на меѓуетничките односи со конкретни акциони планови со што превентивно ќе се влијае врз појавата на евентуалните проблеми и создавње на хармонична атмосфера за развој на меѓуетничките односи, рече Муслиу.

Според него, соработката со општините, како и ангажирањето на другите институции, граѓански организации и медиуми во развојот на локалните политики има позитивно влијание на состојбата со меѓуетничките односи.