Заменик-помошникот државен секретар на САД Ји на средба со членовите на ДИК Скопје, 17 април 2015 (МИА) - Изборни нерегуларности во помал обем се случуваат и во развиени демократски земји, но сторителите на направените нерегуларности сносат одговорност. Доколку тоа не се случи и во Република Македонија може да се доведе под прашалник и нејзиното членство во ЕУ и НАТО. Изборните нерегуларности влијаат врз интегритетот на институциите во државата.
Ова, како што соопшти Државната изборна комисија (ДИК) го истакнал заменик помошник државен секретар на САД за Југоисточна Европа Хојт Ји, кој денеска имаше средба со членовите на ДИК.
- Во едночасовната средба со членовите на ДИК, г. Ји се интересираше како ДИК се соочува со наодите за изборни манипулации и нерегуларности кои се посочени во аферата со прислушувањето, се наведува во соопштението од ДИК објавено на нивната веб-страна.
На средбата сите членови на Комисијата ги изнеле своите видувања.
Заменик помошникот државен секретар на САД за ЈИЕ престојува во дводневна посета на Македонија. Се сретна со премиерот Никола Груевски, со министерот за надворешни работи Никола Поповски, со лидерите на СДСМ и на ДУИ, Зоран Заев и Али Ахмети, а се очекува да се сретне и со претставници на граѓанските организации.
|