Скопје, 20 април 2015 (МИА) - Началникот на ГШ на АРМ генерал-потполковник Горанчо Котески денеска се сретна со бригадниот генерал Волфганг Рихтер, помошник на началникот на штабот на Сојузничката команда на здружените сили на НАТО во Неапол.
На средбата, генералот Котески искажал благодарност за поддршката од командата на НАТО во Неапол, каде АРМ има распоредено двајца штабни офицери. Како што денеска соопшти МО, тој ја истакнал посветеноста на АРМ кон одржување на достигнатите стандарди на Алијансата, кои припадниците на АРМ во пракса ги применија низ учеството во мисиите предводени од НАТО, како и заложбата за понатамошна примена на Концептот за оперативни способности.
Началникот на ГШ на АРМ генерал-потполковник Горанчо Котески укажал на улогата на командата на НАТО во Неапол, во поддршката на Република Македонија за полноправно членство во НАТО, пред претстојниот Самит на Алијансата во Полска.
Генералот Рихтер ја нагласил улогата на Република Македонија и АРМ во градењето на регионалната и глобалната безбедност и искажа благодарност за придонесот на АРМ во борбата против тероризмот, како и за спроведените реформи неопходни за приближување кон НАТО.