ВМРО-ДПМНЕ: Неуспехот на референдумот е порака дека граѓаните не прифаќаат политизацијаСкопје, 26 април 2015 (МИА) - Неуспехот на референдумот е силна и јасна порака не само на граѓаните на Општина Центар, туку од сите, дека нема да дадат поддршка на сценарија и политичка злоупотреба која нема никаква конкретна позитивна цел за самите граѓани, изјави вечерва Илија Димовски, член на Извршниот комитет на ВМРО-ДПМНЕ.
- После денешниот ден треба да разберат дека граѓаните нема да прифатат политизација која им користи само на политичарите и партиите. Граѓаните сакаат работа, работни места, изградба на инфраструктура, булевари, патишта, градинки, рече Димовски, додавајќи дека мнозинството граѓани на Центар покажале дека не ги одобруваат политиките на СДСМ и на нивната коалиција.
Тој оцени дека денешниот ден на сите гласачки места во Центар поминал во демократска и мирна атмосфера и оти во пракса се докажал демократскиот карактер на функционирањето на непосредното одлучување на граѓаните без разлика дали е тоа референдум или изборен процес.
- Би сакал да потенцирам дека ВМРО-ДПМНЕ немаше политичка партиципација на овој референдум освен административна во согласност со законот. ВМРО-ДПМНЕ немаше повик граѓаните да не учествуваат на овој референдум и немаше кампања која би повикувала на гласање или не за овој референдум. Тоа оставивме сами да го одлучат сите граѓани, и оние кои се членови на ВМРО-ДПМНЕ и на СДСМ, на било која партија или воопшто не се членови на партии. ВМРО-ДПМНЕ не кажа дека некое прашање не заслужува одговор онака како што СДСМ го направи тоа за Законот за територијална организација. По тоа се разликува демократскиот карактер на нашата партија во споредба со СДСМ, рече Димовски.
Денес, додаде Димовски, во вода паднаа и анкетите кои градоначалникот Жерновски и СДСМ ги објавуваа во минатите денови со кои тврдеа дека дури 68 проценти од граѓаните го подржуваат нивниот став.
|