Генерално собрание на ЗЕЛС по повод 43. роденденСкопје, 27 април 2015 (МИА) - Актуелните состојби во локалната власт ќе бидат тема на расправа на петтата седница на Генералното собрание на ЗЕЛС што денеска се одржува во Скопје во чест на 43. роденден на Заедницата на единиците на локалната власт на Република Македонија.
На седницата на највисокото тело на ЗЕЛС, претседателот Коце Трајановски, ќе даде отчет за активностите и постигнатите резултати на Заедницата во 2014 година, а ќе се разгледува и Финансискиот извештај за минатата година.
На 26 април, во 1972 година, беше одржано основачкото Собрание на кое е формирана Заедница на општини и градови на Македонија. Затоа, овој датум во Статутот на ЗЕЛС е утврден како „Ден на ЗЕЛС “ и „Ден на општините”. Денешното име - Заедница на единиците на локалната самоуправа на Република Македонија е изгласано на Собранието одржано во април 1998 година.
Заедницата 43 години континуирано спроведува активности во насока на зајакнување на улогата на локалната власт, а последните десетина години ЗЕЛС е насочена и кон обезбедување на квалитетна поддршка на единиците на локална самоуправа за успешно имплементирање на децентрализацијата на власта во земјава.
Генералното собрание е највисокиот орган на ЗЕЛС. Го сочинуваат 81 делегат, односно сите градоначалници на општините и градоначалникот на Град Скопје, како посебна единица на локалната власт. Тоа донесува Статут, програма и другите најважни акти на Заедницата.
|