Охрид, 28 април 2015 (МИА) – Преку плански типизирани предавања на тема „Борба против дрога“ Секторот за внатрешни работи од Охрид продолжува со реализација на проектот „Превенција од зависности“. Во рамки на проектот денеска полициски службеници-едукатори ќе остварат видео презентации и разговори со учениците од основното училиште „Живко Чинго“ од Велгошти, додека такви активности се предвидени утре да се спроведат во подрачното основно училиште во населбата Рача, како и во основното училиште „Григор Прличев“. Слични наменски предавања и видео презентации охридската полиција ќе реализира и во основното и во подрачното основно училиште „Братство“ во Охрид.
Инаку СВР - Охрид преку Оделението за превенција во континуитет реализира превентивни едукативни проекти поврзани со борбата против дрога и други облици на зависности и деструктивни појави. Целта е на најмладите пред се, но и на останатите целни групи, да им бидат предочени опасностите од злоупотребата на наркотиците кои негативно влијаат врз младата популација и се сериозна закана за нивното здравје, сигурноста и безбедноста.
Охридскиот СВР во периодот од 2008 до 2012 година го спроведе проектот „Дрога-вистина и заблуди“ што се реализираше со ученици и нивни родители од сите основни и средни училишта во Охрид, Струга, Кичево, Дебар, Центар Жупа. Тој проект инициран од Канцеларијата за односи со јавност, беше реализиран со непосредни проактивни контакти, како и со видео презентации на македонски, албански и турски јазик. Едукативниот проект „Дрога-вистина и заблуди“ беше презентиран пред околу 25 илјади ученици и девет илјади родители.