Гран при наградата за драмските аматери од Зрновци

Кочани, 5 мај 2015 (МИА) - Во националната установа Центар за култура „Бели мугри“ во Кочани беа доделени наградите на најуспешните претстави и поединци од годинешниот осми по ред Детски драмски фестивал на Македонија, кој во изминатите дваесетина дена се одржуваше на сцената на центарот во Кочани.

Жирито во состав од режисерот Перо Даниловски и актерките Силвана Јаневска и Вита Ковачева, гран при наградата за најуспешна претстава на фестивалот и ја доделија на претставата „Ојле брада во животинска балада на текст од Трајче Кацаров, а во режија на Билјана Горгиева Гаврилова со драмските аматери од ОУ„Синиша Стоилов“ од Зрновци.

Наградите за режија ги добија Лила Арсова и Орданка Петкоска од ОУ „Рајко Жинзифов“ од село Горно Оризари, Велешко. Наградата за сценски говор и припадна на драмската група од ОУ„Крсте Петков Мисирков“ од Радовиш, наградата за аматерски драмски текст ја доби Анета Велковска за текстот „Отровен лек“. Наградите за машка и женска улога ги добија Никола Симоновски од ОУ„Вера Циривири Трена“ од Скопје и Елена Мискоска од ОУ„Јонче Смугрески“ од село Обршани, Кривогаштани.

Победничката претстава од годинешниот Детски драмски фестивал ќе настапи на 51-от ДАФ во Кочани во категоријата детски претстави.