Шефот на кабинетот на германската канцеларка Ангела Меркел, Петер Алтмаер го повикал на средба американскиот амбасадор во Берлин во врска со наводите дека американски шпиони биле активни во главниот град на Германија. Извори во германската влада тврдат дека ќе се разговара за информации според кои американските служби шпионирале високи германски владини претставници.
-Шефот на кабинетот на канцеларката го покани американскиот амбасадор на состанок по откритијата за поставени прислушни уреди. Средбата треба да се одржи попладнево, се вели во информацијата од германската влада.
Во најновиот скандал за американско шпионирање на германски цели, медиумите информираа дека американската Национална агенција за безбедност (НСА) прислушувала неколку членови на владата. Меѓу нив биле канцеларката Меркел и министрите за економија Габриел и за финансии Шојбле. Според информациите што ги објави Викиликс Американците ги следеле разговорите во врска со начинот на кој што требало да се реши грчката криза.