Виена, 5 јули 2015 (МИА) - Иран и земјите од групата пет плус еден (САД, Кина, Русија, Франција, Велика Британија и Германија), никогаш не биле поблизу до договор за иранската нуклеарна програма, изјави државниот секретар на САД Џон Кери.
- Моите колеги денес се враќаат во Виена. Дојде време да видиме дали може да склучиме договор или не, рече Кери, кој додаде дека преговорите „се уште можат да тргнат во една или друга насока“.
- Тие преговори траеја долги години и во изминатите неколку дена ние постигнавме вистински напредок. Сакам, меѓутоа, да е сосема јасно, се уште не сме стигнале до каде што треба по некои од најсложените прашања, рече првиот дипломат на САД.
САД се подготвени да ги напуштат преговорите, ако Иран и групата пет плус еден не постигнат договор во рамки на договорениот рок од 7 јули, изјави Кери.
- Ќе разговараме зад затворени врати, и кога ќе дојде време, ќе кажеме што е потребно да се каже, рече државниот секретар на САД.