ОН го објави формирањето на либиска Влада на национално единствоТриполи, 9 октомври 2015 (МИА) - Пратеникот на ОН за Либија, Бернардино Леон соопшти дека е формирана либиска Влада на национално единство, која ќе биде предводена од премиерот Фајез ел Сараџ и тројца вицепремиери Ахмад Мејтиг, Фатхи ел Меџбри и Муса ел Кони.
Ова претставува чекор напред кон враќање на редот во земјата, која се наоѓа во хаос по соборувањето од власт на Моамер Гадафи во 2011 година. Оттогаш Либија е поделена меѓу владата во Триполи, која е поддржана од исламистите и меѓународно признатата Влада во градот Тобрук.
Сараџ е член на Парламентот од Триполи, а тројцата вицепремиери се претставници на источниот, западниот и јужниот дел на Либија. Двајца од министрите се жени.
- Сите тие ќе работат тимски. Задачата не беше лесна. По една година напори во овој процес со повеќе од 150 либиски претставници на сите области, на крајот дојде моментот за формирање Влада на национално единство, истакна Леон на прес-конференција во мароканскиот град Схират, каде во понеделникот започна нов круг преговори меѓу двете либиски сопернички страни.
Сега останува новата влада да биде одобрена од двете страни и од самите Либијци. засега не се знае дали и двете групи целосно го поддржуваат списокот на кандидатите, особено властите во Триполи, кои се поделени меѓу радикално и умерено движење.
Високата претставничка на ЕУ за надворешна политика и безбедност, Федерика Могерини го поздрави составувањето на новата либиска влада, како и преговарачите, кои според нејзе покажале „одговорност и лидерство во еден многу критичен и важен момент во историјата на својата земја“.
|