Европскиот парламент ја кани Шинаватра, а Тајланд смета дека тоа е провокација

Бангкок, 24 ноември 2015 (МИА) - Тајландските медиуми ја објавија веста дека поранешната премиерка Јинглук Шинаватра од Европскиот Парламент добила покана да патува во Париз, или, по нејзин избор, во Стразбур, за размена на мислења околу политичката ситуација во Тајланд. Шинаватра во мај минатата година беше сменета од премиерската функција со воен удар, а за да патува надвор од земјата мора да бара дозвола од сегашните воени власти.

Поканата до Шинаватра ја потпишал Елмар Брок, претседател на комисијата за надворешни работи на Европскиот Парламент.

Поранешната премиерка на Тајланд, по соборувањето, само еднаш, во јули минатата година, добила дозвола да патува во Париз, на прослава на роденденот на својот брат Таксин Шинаватра, кој како неа беше премиер, а сменет со воен удар во 2006 година и сега е во „доброволен егзил“ во странство.

Првите оценки на аналитичарите се дека Европскиот парламент прави нов обид за мешање во внатрешните работи на Тајланд. Веднаш по воениот удар во мај 2014 ЕУ ги замрзна односите со Бангкок, но изјавите на неколку амбасадори од државите на ЕУ во врска со враќањето на демократијата во Сијамското кралство од сегашниот премиер, генералот Прајут Кан-ока беа оценети како груби обиди за мешање во внатрешните работи на Тајланд. Од остри критики за своите анализи за политичката состојба во Тајланд не беа поштедени ни амбасадорите на САД и Австралија.

Поранешната премиерка Шинаватра ја очекува судење поради небрежност кога била на функција и според обвинувањата предизвикала штета од над 20 милијарди долари при спроведувањето на шемата за државни субвенции за производителите и трговците со ориз.