Сириската армија и нејзините сојузници презедоа град во провинцијата Дера

Дамаск, 5 февруари 2016 (МИА) - Сириските безбедносни сили и нивните сојузници денеска го презедоа под своја контрола градот Атаман, кој се наоѓа во близина на градот Дера.

Освојувањето на градот Атаман се случува еден ден откако реонот беше цел на десетици воздушни напади, за кои се претпоставува дека биле извршени од руски авиони, соопшти Сирискиот центар за мониторинг на човековите права, со седиште во Лондон.

Портпарол на „Лива ал Мутаз“, главната бунтовничка група во Атаман, не го потврди падот на градот во рацете на противникот. Тој само изјавил дека тие таму продолжуваат со жестоки борби.

Меѓу последните воени успеси на безбедносните сили во провинцијата Дера е преземањето на стратешкиот град Шеик Маскин на 26 јануари. Со тоа армијата обезбеди конбтрола врз патиштата за испораки меѓу Дамаск и јужните области.

Сириската армија и нејзините сојузници, меѓу кои е и либанската радикална група Хезболах, постигнаа значителни успеси и во нападите против бунтовниците во провинцијата Алепо. Овие напади, поддржани од руските военовоздухопловни сили, придонесоа за прекин на мировните преговори за сириската криза во Женева.